©®सौ. प्रतिभा परांजपे.
उर्वशीची बी.एम.डब्लु कार पाहून फोटोग्राफर धावत आले. उर्वशी बाहेर येतात भराभर फोटो क्लिक व्हायला लागले. मागे मागे इतर सेलिब्रिटी ही यायला लागले.
स्टेजवर येतात उर्वशीचे फोटोशूट सुरू झाले.
उर्वशी दोन तीन स्टाईल चे फोटो देत असताना अचानक फोटोग्राफर दाराकडे धावले “नर्गिस बानू आयी है” असा हल्ला ऐकून बाकीचे फोटोग्राफरही तिला सोडून तिकडे धावले .
नर्गिस बानो ही आजची हाॅट नवोदित मुलगी
उर्वशी मनातून अपसेट झाली पण चेहऱ्यावर भाव न येऊ देता हसत हसत इतर समवयस्क कलाकारांशी बोलत फिरू लागली.
ही ग्रँड पार्टी आशुतोष मुखर्जीच्या फिल्म च्या प्रोमाची होती. नवे जुने बर्याच कलाकारांना निमंत्रण होते.
त्या पार्टीत सुबोध गांगुलीं च्या नव्या फिल्म ची चर्चा होत होती
“मॅम एक नवीन फिल्म सुबोध गांगुली यांची सुरू होत आहे “,सेक्रेटरी निशि ने बातमी दिली जुन्या मदर इंडिया चा रिमेक. ब्लॉकबस्टर बनवण्याचा विचार आहे त्यासाठी हीरोइन अजून ठरली नाही, पिक्चर फिल्म फेस्टिवल मध्ये जाईल असे ऐकून आहे. बर्याच जुन्या ,नव्या हिरोईन वशीला लावू पहात आहे या रोल साठी.
उर्वशी विचारात पडली ही पिक्चर तिला मिळायला हवीच. तिच्याबरोबरच्या सगळ्याच नट्या म्हाताऱ्या दिसायला लागलेल्या त्यात उर्वशी अगदी अजूनही नव्यांना टक्कर देईल इतपत आपले तारुण्य राखून होती.
घरी आल्यावर आरश्या समोर उभी राहून तिने स्वतःला न्याहाळले. मागच्याच आठवड्यात युरोप होऊन परत आली, तिथे मेकओव्हर करून आली होती. त्यामुळे ती फ्रेश दिसत होती. जशी वीस वर्षांपूर्वी होती. हे तारुण्य, हे सौंदर्य राखण्यासाठी तिने काय काय नाही केलं…?
अगदी लहान असल्यापासूनच ती खूप सुंदर आहे याची तिला जाणीव घरातल्यांच्या बोलण्यातून व्हायला लागली. अम्मा तर रोज तिची दृष्ट काढायची . शाळेत स्नो व्हाईट नाटकातही तिलाच रोल मिळाला. परी सारखी सुंदर म्हणून.
उर्वशी हे तिचं खरं नाव नव्हतं.
‘सुमुखी,’ अम्माने ठेवलं होतं. नाटकात पहिलं बक्षीस म्हणून एक सुंदर आरसा तिला मिळाला, आपल्या रूममध्ये तिने तो लावला. त्यात रोज ती आपले रूप न्याहाळत असे .
नाटकात ल्या आरशाप्रमाणे तिला तिच्या रूपाची ग्वाही आरशाकडून मिळत होती. हळुहळु तिला आपल्या रुपा चा, सौंदर्याचा अभिमान वाटू लागला . सौंदर्याच्या जोरावर आपण काहिही मिळवू शकतो असा गैरसमज तिला झाला.
पाहता पाहता सुमुखी कॉलेजला पोहोचली. तिथेही तिच्या रुपा ची चर्चा होती ,तिला काॅलेज क्वीनचा किताब मिळाला. एका मोठ्या कंपनीकडून तिला ब्युटी प्रोडक्ट ची माॅडेल म्हणून ही ऑफर मिळाली.
अनेक तरुण तिच्या मागेपुढे करत. कॉलेजच्या एका फंक्शनमध्ये तिला एका प्रोड्युसर ने पाहिलं आणि फिल्म साठी ऑफर दिली आणि तिथेच सुमुखी ची ती उर्वशी झाली.
आता ती सौंदर्याबाबत जास्तच काळजी घेऊ लागली. एक्टिंग मध्ये मात्र ती जेमतेम होती. सौंदर्याच्या जोरावर तिला काही चित्रपट मिळाले.
तीस-पस्तीस ची होता होता तिला मनोज कपूर ने मागणी घातली. एक मोठा इंडस्ट्रियलिस्ट तिच्या रूपाने मोहित झाला होता. थाटात लग्न झाले, फिल्म इंडस्ट्री तले बरेच जण आले होते.
एक वर्ष झाले लग्नाला, उर्वशी ची डिमांड कमी होत होती. आता तिला मुख्य हिरोईन च्या जागी साईड रोल च्या ही ऑफर येत.
त्या ती नाकारू लागली. त्यातच मनोजला एक मूल हवं असं वाटू लागलं. उर्वशीने बरेचदा टाळायचा प्रयत्न केला.
या इंडस्ट्रीमध्ये आई झालेल्या हिरोईनची मागणी कमी होत जाते त्यांना साईड रोल किंवा कमी दर्जाचे काम मिळते आपले स्वातंत्र्य, सौंदर्य घालवून बसतात हे तिने पाहिलं होतं..
तिचा वाढदिवस होता नेहमीप्रमाणे तिने तो थाटात साजरा केला. एका फिल्म ची ऑफर तिला मिळाली, त्याच आनंदात ती होती. दरवर्षीप्रमाणे तिने खूप से फोटो शूट केले.
आपल्या त्या आरशात तिने स्वतःला निरखले, आरस्याने अजूनही तू तशीच सुंदर आहे अशी ग्वाही दिली.
मनोज तिला सतत मूल हवं म्हणून हट्ट करू लागला. पण या नव्या पिक्चरचं काम झालं की च कारण तिने पुढे केले, दोघांमध्ये वाद झाला. “अरे काय सारखे मूल मूल करतो, अजून वय झालं नाही माझं” उर्वशी बेफिकीर होत म्हणाली.
“ तुला मूल नकोच आहे कां ?” त्याने स्पष्ट विचारले.
तेव्हा उर्वशीने, “सध्या तरी मला ती जबाबदारी नको” असे सांगितले.
मनोज ने तिला समजावून पाहिलं. तो म्हणाला “मूल म्हणजे आपल्या प्रेमाची निशाणी असेल घराण्याचा वारस वगैरे बरेच “ पण तिने त्याचे बोलणे धुडकावून लावले. दोघात खूप भांडण झाले त्या रागाच्या भरात उर्वशीने वेगळ घर घेतलं .
ती आणि मनोज वेगळे झाले. उर्वशीने सगळं लक्ष कामावर केंद्रित केलं .तिचे दोन तीन सिनेमे हिट झाले.
आता तिचे नाव त्या हिरो बरोबर गाॅसिप मधे लोक घेऊ लागले. त्यामुळे तिला एक पिक्चर अजून मिळाला. तिचा उत्साह ही वाढला.
“मॅडम,” सेक्रेटरी निशीच्या आवाजाने ती भानावर आली.
” मॅडम ते सुबोध गांगुलींशी आपली भेट आठ दिवसांनी फिक्स करूया का?”
“हो हो तोपर्यंत मी जरा युरोप टूर करून येते. नव्या पिक्चर साठी फ्रेश लुक हवा.”
उर्वशी परत मेकओव्हर करून नव्या फिल्म साठी सज्ज झाली.
बरोबर आठ वाजता गांगुली कडे जायचे म्हणून मेकअप आर्टिस्ट तिला तयार करत होती.
“मॅडम कुठल्या पिक्चरची ऑफर?”
“अग फार मोठी ऑफर आहे! मला हवी आहे. मी ती मिळवणारच.”
“काय स्टोरी आहे?”
“पता नहीं ” बेफिकिरपणे तिने उत्तर दिले.
गांगुलींकडून उर्वशी परत आली, तिचं डोकं भडकलेलं होतं.
सेक्रेटरीने तिचा मूड पाहून काहीही विचारले नाही, तरीही ती रागात बडबडायला लागली “समझता क्या है अपने आपको? “माझ्यासारख्या स्टारला म्हणतो तुम्हाला जमणार नाही? चॅलेंज देत होता.”
सेक्रेटरी चुपचाप निघून गेली.
उर्वशी खोलीत आली. आरस्या समोर उभ राहून तिने स्वतःला पाहिलं, तशीच वीस वर्षांपूर्वीची दिसते म्हणून रिजेक्ट? कां तर आईच्या रोलला मी फिट नाही? गेटअप आणि मेकअप ने सर्व करता येतंं. उर्वशीने आरग्यु केलं तरी ही.
नो–!…..
सुबोध चे ते जळजळीत वाक्य तिच्या कानात गरम शीशाप्रमाणे शिरले, “तुम्ही आई नाही दिसणार ! तो भाव , ते ममत्व, त्याचा तुम्हाला अनुभव नाही. तुमचा चेहरा एक प्रेमळ वयस्कर आईचे फिलिंग नाही दाखवू शकत.”
निघताना तिच्या कानावर गांगुली चे शब्द आदळले, “एक्टिंग कशाशी खातात हे तरी ठाउक आहे?नुसता कचकड्या ची बाहुली…”
बाहेर गांगुली चा सेक्रेटरी माया कपूर ला रोल मिळणार असे कोणाशी बोलत असताना तिने ऐकले.
उर्वशीचे डोके फिरले ती रागात निघून आली, कोण माया कपूर? ती या रोल साठी? काय आहे तिच्यात ? मान्य अभिनय माझ्या पेक्षा जास्त चांगला असेल, पण रुप?
समोर आरसा तिचं सौंदर्य दाखवत होता. पण मनाच्या आरशात मुखवट्या मागचा चेहरा तिला हिणवत होता.
खरंच आईपणाचा अनुभव नाही घेतला! त्या भावना कशा असतात कोण जाणे? गांगुली ने तिच्या दुःखर्या नसे वर बोट ठेवले.
सौंदर्य राखण्याच्या या कल्पनेने तिने स्वतःला त्या सुखापासून वंचित केले नी आता ती वेळ निघून गेली.
“हे तारुण्य खोटं आहे, वय वाढलेल आहे, हा नकली चेहरा आहे. तुझी हार झाली आहे” असे आरस्यातलं प्रतिबिंब तिला म्हणू लागले. ती संतापाने बेभान झाली, आणि रागाच्या भरात तिने त्यावर हातातला ब्रश फेकून मारला.
तिच्या आवडत्या आरस्या ला असंख्य तडा गेल्या आणि अधिकच विकृत असे तिचे अनेक प्रतिबिंब आरशात तिला दिसू लागले. आणि तिला खिजवू लागले सहन न होऊन तिने आपला चेहरा दोन्ही हाताने झाकून घेतला.
समाप्त.
©®सौ. प्रतिभा परांजपे.
सदर कथा लेखिका सौ. प्रतिभा परांजपे यांची असून त्यांच्याकडून रितसर लेखी परवानगी घेऊन आम्ही शेअर करीत आहोत. या लेखाचे सर्व हक्क लेखिकेकडे राखीव असून आमचा त्यावर काहीही अधिकार नाही.
धन्यवाद.!!!
📝
माझी लेखणी
फोटो गुगल वरुन साभार …अशाच नवनवीन कथा आणि लेख वाचण्यासाठी आमच्या ‘माझी लेखणी’ या फेसबुक पेजला फॉलो करा.